भारतलाई बाबुरामको सुझाव : शक्तिशाली चीनसँग प्रतिस्पर्धा नगरेकै राम्रो

काठमाडौं, १९ कात्तिक-पूर्व प्रधानमन्त्री तथा नयाँ शक्ति नेपालका संयोजक डा. बाबुराम भट्टराईले चीन र भारत दुवैले नेपाल मामिलामा आफूलाई प्रतिस्पर्धी भन्दा सहयात्रीका रुपमा उभ्याउनुपर्ने बताएका छन् ।

इण्डिया फाउन्डेसन, नेपाल नीति अनुसन्धान प्रतिष्ठान र सेन्टर फर कन्टेम्पोररी स्टडिजले संयुक्त रुपमा काठमाडौंमा गरेको ‘नेपाल र भारत : नयाँ आयामको खोजी’ बिषयक गोष्ठीमा बोल्दै डा. भट्टराईले नेपालको आर्थिक समृद्दिमा चीन र भारत दुबै छिमेकीको भूमिका रहेको उनले बताए । भट्टराईले चीनको नेपालमा मुख्य चासो तिब्बती मामिला रहेको बताए ।

‘एक चीन नीतिमा नेपालले समर्थन जनाइसकेको छ । उसको नेपालमा अरु खासै चासो छैन’ उनले भने । उनले भारतले चीनसँग प्रतिस्पर्धा गर्ने अवस्था नरहेको पनि बताए ।

‘भारतलाई चीनसँग प्रतिस्पर्धा नगर्न म सुझाव दिन्छु’ उनले भने । भट्टराईले भारत र नेपालबीचको सम्बन्ध अन्य कुनै मुलुकसँग हुन नसक्ने पनि बताए । भारतका सुरक्षा लगायतका चासोलाई नेपालले सम्बोधन गर्नुपर्ने र भारतले नेपालको सार्वभौमसत्ताको सम्मान गर्नुपर्ने उनको भनाइ छ ।

‘नेपालको दुई तिहाई सम्पर्क र सम्बन्ध भारतसँग छ र त्यो अन्य कुनै पनि मुलुकसँग छैन् । यो धरातलीय यथार्थलाई बुझेर नेपालले आफ्ना नीति र व्यवहारहरु निर्देशित गर्न आवश्यक छ’ उनले भने । भारतीय राष्ट्रपति प्रणव मुखर्जीले उक्त गोष्ठिको समापन बिहीबार साँझ गरे ।

आजको अन्नपूर्ण पोस्ट दैनिकमा खबर छ ।

यसमा तपाईको प्रतिक्रिया